Eli Lilly va Insilico 2,75 mlrd dollarlik AI hamkorlikni yo‘lga qo‘ydi — yangi dorilar global bozorga chiqadi

Kelishuvga ko‘ra, Insilico dastlab 115 million dollar oladi, qolgan to‘lovlar esa regulyator va tijoriy bosqichlarga bog‘liq bo‘ladi. Shuningdek, kompaniya kelajakdagi savdolardan royalti ham oladi.

Insilico generativ AI orqali kamida 28 ta dori ishlab chiqdi, ularning qariyb yarmi allaqachon klinik bosqichga yetgan. Kompaniya bosh direktori Alex Zhavoronkov CNBC’ga bergan intervyusida kompaniya aksiyalari yil boshidan beri 50% dan ortiq o‘sganini ma’lum qildi.

Uning aytishicha, ba’zi AI yo‘nalishlarida Lilly ustunlikka ega. Kelishuv doirasida Insilico Lilly’ning Gateway Labs biotexnologiya platformasiga qo‘shiladi. Ikki kompaniya 2023-yildan beri AI dasturiy ta’minoti bo‘yicha hamkorlik qilib kelmoqda.

Lilly’ning Molecule Discovery bo‘limi vitse-prezidenti Andrew Adams bu hamkorlik yangi davolash mexanizmlarini o‘rganish va istiqbolli dorilarni tezroq aniqlash imkonini berishini ta’kidladi.

Shu oy boshida kompaniya bosh direktori David A. Ricks Pekindagi yuqori darajadagi forumda ishtirok etdi. Kompaniya keyingi 10 yil ichida Xitoyga 3 milliard dollar investitsiya kiritishni rejalashtirmoqda. O‘tgan yili Lilly daromadining qariyb 3% dan kam qismi Xitoy hissasiga to‘g‘ri kelgan.

Insilico esa AI tadqiqotlarini asosan Kanada va Yaqin Sharqda olib boradi, ammo dastlabki dori sinovlarini Xitoyda o‘tkazadi. Kompaniya rahbari AI texnologiyalari tadqiqot vaqtini qisqartirish va molekulalarni an’anaviy usullarga nisbatan tezroq yaratish imkonini berishini qayd etdi.